Далеку над Арктичкиот круг, каде што величествените планини се издигнуваат директно од морето, мала група пријатели од различни краеви на светот, тргнува на уникатно патување – во потрага по недопрени скијачки спуштања, во еден од најизолираните предели на планетата.
Од Полска до Нов Зеланд, но и од други места, нивните патишта се сретнуваат на две едрилици – Naomi и Festina Lente – со кои пловат низ длабоките фјордови и непредвидливите арктички води. Комбинирајќи едрење и скијање, тие ја прифаќаат авантурата во нејзината најчиста форма: барајќи изолација, прилагодувајќи се на променливото расположение на природата и спуштајќи се по падини и кулоари кои ретко кој ги допрел. Секое спуштање е заслужено, секој врв е награда, а океанот станува нивен автопат кон свет каде времето се забавува, а планините им припаѓаат само на оние што се подготвени да одат подалеку.
Овој филм е повеќе од само скијачки филм – тоа е приказна за слободата, истражувањето и врската меѓу луѓето обединети од иста страст. Во драматичната позадина на северна Норвешка, филмот ја слави убавината на патувањето таму каде што ретко кој се осмелил да зачекори и вечната потрага по совршената линија.
